මහසෝනා හැදුනේ මෙන්න මෙහෙමයි

රිටිගල ජයසේන හෙවත් අපි දන්න මහසෝනා හම්බවුනා පරණ කතාවක්. මොකක්ද දන්නවාද ඒ? මහසෝන් යක්ෂයා එහෙමත් නැතිනම් අපි දන්න මහසෝනා බිහිවුනේ කෝහෝමද කියාලයි. නම ඇහුවත් බයයි වගේ ! ඇත්ත නැත්ත කෙසේ වුනත් කතාව නම් නියමයි ! මෙහේම තමා කතාව පටන් ගන්නේ! ගැමුණු රජ්ජුරුවෝ එලාර රජුව පරදලා ජයගත්තට පස්සේ ගෝඨයිම්බර යෝධයා අලුත් නිවසක් තනා ගෙට ගෙවදීම නිමිත්තෙන් ඉතා විශාල උත්සව‍යක් සංවිධානය කරලා ගොඩාක් අයට මේ උත්සවයට ආරාධනා කලා. සාදයේ මුලදීම ගෝඨයිම්බර මත්පැන් නිසා මත් වීම නිසා ඔහුගේ බිරිද සෝනා කුමරිය පැමිණි අය පිලිගන්න රාජකාරිය කලේ. ඒ අසලින් එදා ගමන් කරපු ආරාධනයකින් තොරව එකවිටම මැදිවිය ඉක්මවු කලු ඇගපත මනාව වැඩුනු පුද්ගලයකු සාදය‍ට පැමිණි අතර කුමරිය මේ හැඩරුව පවසමින් ඒ බව ගෝඨයිම්බරයා පැවසු අතර කියු හැඩරුව අනුව එකවිටම ඔහු හදුනා ගත් ගෝඨයිම්බරයා ඔහුව පිලිගෙන සංග්‍රහ කරන ලෙස සෝනා කුමරියට අණ කලා.

ඒ වෙන කිසිවකු ‍නොව නම ඇසු පමණින් බොහෝ දෙනා බිය සලිත වන රිටිගල ජයසේනය.රිටිගල ජයසේන යනු ගැමුණු කුමරුන්ට ජය පතා යක්ෂ සේනාව මෙහෙය වු ඇතුන් 10 ශක්තිය ඇති සේනාධිපති තුමායි.‍‍ ගෝඨයිම්බර ‍සෙනවිත් මේ ජයසේනට සාදයේ හොද හැටි කෑම බීම දී සැලකු අතර මධුවිතෙහි ප්‍රමාණය වැඩි වු විටම සියල්ල අමතක වු ජයසේන එකවිටම සිතට ආ අදහසකට සෝනා කුමරිය වැලද ගත්තේය. එකවරම මෙය දුටු ‍ගෝඨයිම්බර සෙනවියාට තරු විසිවුනු අතර ජයසේනට අසැබි වචනයෙන් බැන වදිමින් තම නිවසින් යන ලෙස තර්ජනය කරන ලදි.

රිටිගල ජයසේන ඉතා ලැජ්ජාවට පත් වුනු අතර තරහත් සමඟම ගෝඨයිම්බරයා තමාට කිසිම අභියෝගයක් නැති බවත් සතියකින් තම්මැන්නා සුසාන භුමියේ දී හැකි නම් ද්වන්ධ සටනකට එන ලෙසත් උත්සව සභාවේදීම ඉතා සැරවැරයෙන් කියා සිටි අතර ‍ ගෝඨයිම්බර ‍සෙනවිත් බිමතින්ම ජයසේන තමාට කිසිදු අභියෝගයක් නොමැති බවත් කඩුවකින් නොව තමාගේ වම් පයේ සුලැගිල්ලෙන් ජයසේනගේ හිස ගසා දමන බවත් මහ හඩින් උත්සව සභාව මධ්‍යයේ බහින් බස් විය.
මේ ආරංචිය දැනගත් ගැමුණු රජු වහාම මේ සටන නවත්වා දමන ලෙස අණ කලත් තම අභිමානය තමන්ට සිදුවු ලජ්ජාව මකා ගැනීමට අනිවාර්යයෙන් මේ සටන පැවතිය යුතු බව දෙදෙනාම පවසා ඇත.

සටනට දිනය පැමිණි අතර සටනට පෙර දා හොදින් මත්පැන් බී සටන දාත් දවල් වන තුරු නිදමින් සිටි ගෝඨයිම්බරයාට එකපාරම තම අභියෝග කල සටන මතක් වු අතර කෑම බීමද අමතකව ඇද සිටි සළුව තදින් ගැ‍ට ගසා උතුරු සළුව හිසේ ජටාවක් ලෙස බැදගෙන සොහොන් බිමට දිව යන්නට විය.
ඒ වන විටත් රිටිගල ජයසේන ලෝහ සන්නායකයක් පැලද සිටිමින් මනාව සටනට සුදානම් වී සිට අතර ඔහු හතර රියන් උස පුද්ගලයකු වු අතර ගෝඨායිම්බරයා ඉන් හරියටම අඩක් උස විය.
ගෝඨයිම්බරයාගේ සහායට සටන නැරඹීමට පැමිණි අය මෙය දුටු සැනින් ම බෝහෝම දුකට පත්වුයේ ගෝඨයිම්බරයා පරාද වේවි යන හැගීම බොහෝම දෙනාගේ සිතට ආ නිසාය.

තම මිතුරාට ආචාර කල ගෝඨයිම්බර සටනට පිවිසිය. ආචාර කිරීමත් සමඟම හිස ඔසවා සතුරා හෙවත් ජයසේනයාගේ මුහුණ බැලු ගෝඨයිම්බර ඇසිපිය ගහන සැනින් අහසට පැන ජයසේනගේ නිකටට තම වම් ප‍යෙන් දැඩි පහරක් එල්ල කලේය. එක විටම අන්ද මන්ද වු ජයසේනට තමා නමස්කාර කරන සෙනසුරු දෙවියන් සිහිවන විටම හිස කදින් වෙන්වී රිටිගල පැත්තේ කරඔ ගසක රැදී ඇත. (අද එම ස්ථානය ඔළුකරදන නම් වේ) මෙය එක විටම දුටු, දැනුන සෙනසුරු දෙවියන් කලබල විම නිසා කල් යල් බලා මනාව වැඩකරන සිරිතද අමතකව ගොස් වහා පැමිණ එවේලෙහි සොයා ගත් වලසකුගේ හිසක් ගෙනවිත් ජයසේනයාගේ හිස නැති සිරුරට දිවි බේරා ගැනීම සඳහා සවි කරන ලදි.
(එම වලසා සොයා ගත්තායයි පැවසෙන්නේ ත්‍රිකුණාමලය මරතඩිය හන්දිය අසල පිහිටි සෙනසුරු කෝවිල් භුමියෙන් ලු)

හැම විටම සිතා මතා වැඩකරන සෙනසුරු දෙවියන්ට කලබලයට ජයසේනයාට වලස් හිස සවිකර ඇත්තේ මුහුණ පිටුපසට සිටින ලෙසය. (පහතරට මහසෝන් නැටුමේදී ද හිස පලදිනු ලබන්නේ පිටුපසටය) එලෙස නැවත පන ලැබු ජයසේන එදා සිට රියන් 81 ක් උස ඇස් 03 හා අත් 04 ඇති රතු ඇදුමින් ද කළු පාට ශරිරයෙන් යුතුව යෝධ ඌර වාහනයකින් ගමන් කරන මහසෝන් යක්ෂයා බවට පත්විය. මොහුට අවතාර 05 ක් ඇති බවද සදහන් වේ.
එනම්,

එළුවකු වාහනයක් කරගත් “ලේ සොහෝන් යක්ෂයා” – මුවකු වාහනයක් කරගත් “අමු සොහොන් යක්ෂයා” – අශ්වයා වාහනය කරගත් “ජය සොහොන් යක්ෂයා” – බැටළු වාහනය සහිත “මරු සොහොන් යක්ෂයාද” – අලියකු පිට යන “ගොළු සොහොන් යක්ෂයාද” මේ මහසෝන් යක්ෂයාගේ පංච අවතාර වේ. වෙසමුණි රජු මහ සොහෝන් යක්ෂයාට දෙගාත ( මිනිස් හා කුකුළු ) බිලිපුද ලබා ගැනීමට අවසර දී ඇත. සුසාන භූමි කදු මුදුන් හා ගිරිහෙල් වාසස්ථාන කර ගත් බුදු අණටද යටත් නොවේ යයි පවසන මහ සෝහෝන් යක්ෂයා ගෝඨයිම්බර දැහැනට පමණක් අවනත වන බව පැවසේ.

(ඒ ගැන නම් විශ්වාස කරන්න අමාරුයි නේද? මොකද බුදු අණට සියල්ලන්ම යටත් වන බැවින් කියලා මට හිතෙනවා) රිටිගල දැනට උගන්වන රිටිගල විශුද්ධි අංගම් ශාස්ත්‍රය නැත්නම් අපි අහලා පුරුදු සුදලිය අංගම් පොර පරම්පරාවේ ද උරුමක්කාරයා එය රිටිගල පරපුරට ලබා දී ඇත්තේ මේ රිටිගල ජයසේන සේනාධිපතියායි. එය අදටත් එම ප්‍රදේශයේ උගන්වනු ලබයි

සීනිවලින් දරුවා ඈත් කර තබන්න

පුංචි සිඟිත්තෙකු උපන්දා සිට මවක් ලෙස නිතරම සිතන්නේ වෙහෙසෙන්නේ දිනෙන් දින වැඩෙන සිඟිත්තාගේ පෝෂණය සම්බන්ධවයි. නිරෝගී සෞඛ්‍යමත් දරුවකු අනාගතයට දායාද කිරීමට නම් නිවැරදි ‍පෝෂණීය සෞඛ්‍යමත් ආහාර රටාවකට හුරු කළ යුතුයි. මේ ආහාර රටාව ලබාදීමේදී අපේ මව්වරුන්ට එන ගැටලු නම් දිනෙන් දින අලුත් වෙනවා.

දරුවකුගේ නිරෝගීභාවය තීරණය වෙන අයුරු දරුවකුගේ ජීවිතයේ මුල් අවුරුදු කීපය තුළ “බර” ප්‍රමාණයට වඩා වැඩි වීම හා අධික සීනි, කැලරි හා තෙල් භාවිතය මේ කාලය සිටම හුරුවීම ඔහුගේ අනාගත ජීවිතයම අඳුරු කිරීමට රෝගී වැඩිහිටියකු කිරීමට හේතු වෙනවා. දරුවන්ගේ කුඩා කාලයේ බර අනවශ්‍ය ලෙස වැඩිවීම වගේම නියමිත බරට වඩා බර අඩුවීමත් දරුවාගේ ජීවිතයට අයහපත් ලෙස බලපාන බව නවතම විද්‍යාත්මක සොයා ගැනීමයි.

මේ නිසා දරුවකු නිරෝගී වැඩිහිටියකු කිරීමට නම් මාස 06ක් වනතුරු මව්කිරි පමණක් ලබා දීම. උපතේ සිටම බර වැඩිකර ගැනීමට නොව උපත් බරට සාපේක්ෂව නියමිත බර පවත්වා ගෙන යාම පිළිබඳ සැලකිලිමත් වීම. වැරදි ආහාර රටා සහ හානිකර ආහාර රසයන්ගෙන් කුඩා කළ සිටම දරුවා බේරා ගැනීම කළ යුතුය. නිදසුනක් ලෙස

අප සංස්කෘතියේ ආහාර රටාව තුළත් නවීන ආහාර ක්‍රමවේද තුළත් පැණි රස හෙවත් සීනි වැඩිපුර පවතිනවා. තේ, කෝපි, පලතුරු පානයකට වුව සීනි දමා පානය කිරීම වගේම තේ බොන වාරයක් පාසා පැණි රස හෝ යම්කිසි බිස්කට් වර්ග භාවිතයට අපේ ජනතාව පෙළඹී සිටිනවා. මෙවැනි වැරදි ආහාර රටාවන් අද වන විට බෝ නොවන රෝග ඉහළ ධාරිතාවකයි පවතින්නේ. මුළු දවසම කය වෙහෙසා වැඩ කරන ලාංකිකයන්ට පැණි රස එතරම් ගැටලුවක් නොවුණත් එක තැන රැකියාවකට හුරු වූ සහ සුඛෝපභෝගි ජීවන රටාවකට වැඩි සීනි අනවශ්‍යයි. එනිසා නිවැරදි ආහාර රටා කුඩා කළ සිටම හැකි පමණ පුරුදු කරන්න. ඒ රටාවට හුරු වූ දරුවා වැඩිවියට පත් වුවත් ඒ රටාවට ප්‍රිය කරාවි.

වයස අවුරුද්දෙන් පසු ආහාර ගැනීම ප්‍රතික්ෂේප කරන දරුවාට ආහාර දීම උපක්‍රමයක් ලෙස සීනි, ලුණු හෝ කෘත්‍රිම රසකාරක වර්ග යොදා නොගත යුතුයි. ඒ වෙනුවට ස්වාභාවික රසකාරක භාවිත කිරීම උචිතයි. වයස අවුරුද්දකට ආසන්න වනතුරු හෝ හැකිනම් අවුරුද්ද පසු වීත් හැකි පමණ කාලයක් ලුණු, සීනි අඩංගු නොකර නැතහොත් ලුණු, සීනි අඩුවෙන් පුරුදු කළ යුතුය.

සෑම ආහාරයකටම අනන්‍ය වූ රසයක් වර්ණයක් ඇති බව හා ඒවා වින්දනය කිරීමට ඉගැන්වීම තුළින් මානසික වර්ධනයට එය ඉතා වැදගත් වෙනවා. දරුවාට කිරි ආහාර හෝ කිරි ලබාදෙන විට රස කළ කිරි වර්ග ලබා නොදෙන්න. රස කළ කිරි පැකට් වෙනුවට ස්වාභාවික නැවුම් එළකිරිවලට සකසා පලතුරු වැනි දෑ යොදා රස කර ලබා දෙන්න. සීනි රස ආහාර ලබාදීම තුළින් රස අංකුර සීනි රසයට වඩාත් කැමැත්ත දක්වන නිසා අනෙක් ආහාර  ප්‍රතික්ෂේප කිරීමට පුළුවනි. මේ නිසා සීනි සහිත ආහාර සම්බන්ධ උත්තේජන දරුවාට හැකි තරම් දීම අවම කරන්න. වැඩෙන දරුවාගේ මොළයේ වර්ධනයට හා ක්‍රියාශීලීත්වයට ග්ලූකොස් අවශ්‍යයි. මේ අවශ්‍යතාවය ස්වාභාවික සීනි මගින් ඉටුකර දෙන්න. අප ගන්නා බොහෝ ආහාරවල දරුවාට අවශ්‍ය සීනි ප්‍රමාණ අන්තර්ගතයි. උදා:- පලතුරු, බත්, අල වර්ග, එළවළු, වෙනත් පිටි සහිත ආහාර.

පිපාසයට සෑම විටම පිරිසිදු වතුර ලබා දෙන්න. නැතහොත් කෘත්‍රිමව සීනි අඩංගු නොකර හෝ අඩු සීනි සාන්ද්‍රණයක් සහිත පලතුරු යුෂ, තැඹිලි වතුර, ‍පොල් වතුර වැනි දෑ ලබා දෙන්න. පාසලට ගෙන යාමට බනිස්, ෂෝර්ට්ඊට්ස් වැනි ආහාර ලබා දීමෙන් වළකින්න. ගර්භණී කාලයේ සිට කිරි දෙන කාලයේදීත් පැණී රසට ලොල් වීම දරුවාගේ සෞඛ්‍යයට හිතකර නොවන බව සොයාගෙන තිබෙනවා. ඒ නිසා ගර්භණී කාලයේදී සිටම පැණි රස, තෙල් භාවිතය සීමා කරන්න. කැලරි නොමැති සීනි නොමැති යනුවෙන් ‍ලේබල් කරන ලද ආහාර, පානවල බොහෝ විට සීනි වෙනුවට සීනි ඇති රසකාරක යොදා තිබෙන අතර මෙම කෘත්‍රිම රසායනයන් මගින් සිරුරේ හෝමෝ ක්‍රියාකාරිත්වයෙහි වෙනස්කම් ඇති කළ හැකිය.

ඉන්සියුලින් ප්‍රමාණය අඩුවීම. වකුගඩු වලින් පෙරීමේ ගැටලු.  පරිවෘත්තීය ක්‍රියාකාරිත්වයට බාධා ඇතිවීම. දරුවන්ට කුඩා කළ සිටම නොදිය යුතු පුරුදු නොකළ යුතු ආහාර කිහිපයක් විශේෂයෙන් ක්‍රීම් බිස්කට්, මේද සහිත බිස්කට් වර්ග ආදිය මීට අයත්. ඒ සඳහා ගෙදර සකසන කුකීස් ලබාදීම සුදුසුයි.

කලින් සැකසූ අසුරා ඇති ආහාර වෙනුවට ගෙදර සැකසූ සීරියල් වර්ග, පියුරි වර්ග ලබා දෙන්න. අයිසිං කේක්/පේස්ටී්‍ර වර්ග වෙනුවට නිවසේ සැකසූ කේක් වර්ග ලබාදීම. රස කැවිලි වෙනුවට පලතුරු හෝ ප්‍රධෘන ආහාර වේලකට පසු උසස් ප්‍රමිතියෙන් යුතු චොක්ලට් කැබැල්ලක් ලබා දෙන්න. ලුණු අධික චිප්ස් වර්ග සෞඛ්‍යයට ඉතාම අහිතකර අතර ඇබ්බැහි වන සුළුයි.

තේ, කෝපි ලබා දෙනවා නම් ඉතාමත් අඩු සාන්ද්‍රණයෙන් සහ සීනි නොමැතිව ලබා දෙන්න.
ඪලලච, බර්ගර්, සමෝසා, වැනි ගැඹුරු තෙ‍ලේ බදින ලද ආහාර දෙවතාවක් එකම තෙ‍ලේ බදින ලද ආහාර සේම සියලුම කෘත්‍රිම රසයන් ඇති ආහාර තුළින් ඈත් කර තබන්න.
මෙවැනි ආහාර රටාවකට හුරු කිරීමෙන් ඔබේ දරුවාට නිරෝගී සෞඛ්‍යමත් පුරවැසියකු වීම සඳහා අඩිතාලම සැකසෙනු ඇති. උපදෙස් සෙනෙහස පදනමේ නිර්මාතෘ Baby care Lanka ආයතනයේ අධ්‍යක්ෂිකා මාතෘ හා ළමා සෞඛ්‍ය උපදේශක ශ්‍යාමලී පතිරගේ

සිසුවාට කියාදුන් අමතක නොවන පාඩමක්

උසස් පෙළ විභාගය සඳහා අධ්‍යාපනය ලබන සිසුවෙකු පොලිසියේ දී බුදුන්ට වඳින ගාථාව නොදන්නාකම නිසා පැයක පමණ කාලයක් පොලිසියේ රැඳී සිට බුදුන්ට වඳින ගාථාව ඉගෙනගෙන පොලිසියෙන් පිටත්ව ගිය පුවතක් දඹුල්ල පොලිසියෙන් වාර්තා විය. දඹුල්ල නගරාසන්නයේ පදිංචි මෙම පාසල් සිසුවා දඹුල්ල නගර මධ්‍යයේ විශේෂ පොලිස් මාර්ග බාධකයේ දී අත්අඩංගුවට ගෙන ඇත්තේ සිය යතුරුපැදියේ අංක තහඩු උඩු යටිකුරුව සවි කරගෙන යෑම හේතුවෙනි.

මෙම සිසුවාගෙන් මූලස්ථාන පොලිස් පරීක්ෂක සම්පත් වික්‍රමරත්න මහතා දිගින් දිගටම ප්‍රශ්න කිරීමේදී හෙළිවී ඇත්තේ තමන්ගේ මිතුරෙකු විදේශගතවීමට සූදානමින් සිටින බවත් නගරයට යන්නට පැමිණෙන්නැයි ඔහුගෙන් දුරකතන ඇමතුමක් ලැබෙන විට තමන් යතුරුපැදිය සුළු අලුත්වැඩියාවකට ලක් කරමින් සිටි බවය. පසුව මිතුරාගේ ආරාධනය නිසා ඔහු බැලීමට දඹුල්ල නගරයට කඩිනමින් පැමිණීම සඳහා කලබලයට ගලවා තිබූ අංක තහඩුව සවි කරගෙන ඇත්තේ උඩුකරුව බවය.

මූලස්ථාන පොලිස් පරීක්ෂකවරයා වහාම තම නිලධාරින් ලවා ඔහු සිදුකරන ප්‍රකාශය පිළිබඳව පැය කිහිපයක් ඇතුළත සත්‍ය අසත්‍ය අවබෝධ කරගෙන තිබේ. එමෙන්ම ඔහුගේ මිතුරන් පිරිස ද දඹුල්ල පොලිසියට කැඳවා තිබුණි. දඹුල්ල ප්‍රදේශයේම උසස් පාසලක උසස් පෙළ අධ්‍යාපනය හදාරන මෙම සිසුවාට දැඩි ලෙස අවවාද කොට මවට වඳින, පියාට වඳින සහ බුදුරජාණන් වහන්සේට වඳින ගාථාව කියන්නැයි මූලස්ථාන පොලිස් පරීක්ෂකවරයා සිසුවාට නියම කළේය.

මව සහ පියාට වඳින ගාථා දෙක ඉතා සෙමින් ස්ථාන කිහිපයක් වරදවමින් කී සිසුවා බුදුන්ට වඳින ගාථාව නොදන්නා බව පැවසීය. පසුව මූලස්ථාන පොලිස් පරීක්ෂක සම්පත් වික්‍රමරත්න මහතා ඔහුගේ මිතුරන් කැඳවා වහාම තම මිතුරාට බුදුන්ට වඳින ගාථාව කටපාඩම් කරවා තමා ඉදිරියේ එය කියා පිටව යා හැකි බවට අවවාද කළේය.

උසස් අධ්‍යාපනය ලබාගැනීමට සිටින බොහෝ දරුවන් සිය මව්පියන්ගේ අනුදැනුමකින් තොරව මව්පියන්ගේ උපදෙස් නොතකා මෙයාකාරයෙන් හැසිරීම බරපතළ ප්‍රශ්නයක් බවත් මේ වනවිට බොහෝ උසස් පෙළ විභාගය සඳහා පෙනී සිටින දරුවන් සිය හිසකෙස් විවිධ පාට ගන්වා කන්වල කරාබු දමා අඳින කලිසම විවිධාකාරයෙන් ඉරා දමා ඉතා අශෝභන ලෙස ජීවත්වන බවද හෙට මේ රට භාර ගැනීම සඳහා සිටින බුද්ධිමත්ම ජන කොටස මෙම පිරිස බව පෙන්වා දෙමින් මිතුරන් සියලු දෙනාටම දැඩි ලෙස අවවාද කරන්නට මූලස්ථාන පොලිස් පරීක්ෂකවරයා පියවර ගත්තේය.

රාත්‍රී අහස අදුරු ඇයි

රාත්‍රී අහස අඳුරු ඇයි කියා කෙනෙකු ඔබෙන් ප්‍රශ්ණ කලොත් ඔබ දෙන පිළිතුර කුමක්ද? මෙය කුඩා ළමයකුට වුවද පිළිතුරු දිය හැකි සරල ප්‍රශ්ණයකි. අප සැම ජීවත් වන ලෝකය හෙවත් පෘථිවිය ගෝලාකාර වස්තුවකි. සූර්යයා වටා කක්ෂගතව පවතින පෘථිවිය මතට සූර්යයාලෝකය පතිත වනුයේ හිරු මුහුණලා සිටින දිසාවට පමණි. අනෙක් පසට සූර්යයාලෝකය පතිත නොවන බැවින් අඳුර හෙවත් රාත්‍රිය උදා වෙයි. රාත්‍රිය ඇති වනුයේ මෙලෙසිනි. රාත්‍රී අහස අදුරු වනුයේ සූර්යයා අහසේ දර්ශණය නොවන නිසාවෙනි. රාත්‍රී අහස අදුරු ඇයි යන සරල ගැටලුවට ඔබ දෙන පිළිතුර වන්නේ මෙය බවට කිසිදු සැකයක් නැත.

19 වන සියවසේ ජීවත් වූ ප්‍රසිද්ධ තාරකා විද්‍යාඥයෙකු හට රාත්‍රී අහස අදුරු ඇයි යන ගැටලුවට මේ පිළිතුර ප්‍රමාණවත් නොවිනි. ඔහු මේ ගැටලුව ඉතා තදින් ගැඹුරට අධ්‍යනය කලේය. ඔහුගේ ගණනය කිරීම් වලට අනුව සූර්යයා නොතිබුනත් රාත්‍රීයට උනත් හිරු පායා ඇතිවාක් මෙන් අහස ආලෝකමත්ව තිබෙනු ඇත. මේ පුද්ගලයා නමින් හෙන්රිච් ඔල්බර්ස්ය (Heinrich Olbers). මොහු ජර්මන් ජාතික තාරකා විද්‍යාඥයෙකි.

Heinrich Olbers ඔල්බර්ස් ඉදිරිපත් කරන තර්කය මෙසේය. රාත්‍රී අහසේ තාරකා අති විශාල ප්‍රමාණයක් පවතී. තාරකා යනු සූර්යයා වැනි වස්තූන් බව ඔබ හොදින් දනී. ඔල්බර්ස් මතු කරන තර්කය වන්නේ මෙතරම් වූ තාරකා තිබෙනවා නම් ඒවා සියල්ලගේම ආලෝකය අප පෘථිවිය මතට පැමිණිය යුතු බවයි. උදාහරණයක් ලෙස ඔබ විශාල වනාන්තරයක් මැද සිටිනවා යැයි සිතන්න. ඔබ වට පිට බැලුවහොත් ඔබට පෙනෙනුයේ ගස් කොලන් පමණි. වනාන්තරයට එපිටින් ඇති කිසිවක් ඔබට නොපෙනෙනුයේ විශාල ප්‍රදේශයක් පුරා පැතිර පවතින ගස් වලින් අවට සියලු දේ වැසී යන බැවිනි. පෘථිවියට එපිටින් ඇති තාරකාද අපට දිස් වන්නේ මෙලෙසිනි. මේ නිසා මුලු අහසම දීප්තිමත්ව පැවතිය යුතුය. නමුත් ඇත්තටම මෙලෙස සිදු නොවන බව අමුතුවෙන් කිව යුතු නොවේ. එසේනම් ඔහුට වැරදී ඇත්තේ කොතැනද?

ඔල්බර්ස් තම තර්කය ඉදිරිපත් කරනුයේ ගණනය කිරීමක්ද සහිතව ඉතා සවිස්තරාත්මක ප්‍රකාශයක් ලෙසිනි. මෙය පැහැදිලිව අධ්‍යනය කල විට ඔහු ඉදිරිපත් කරන තර්කයේ වැරද්දක් නැති බව පැහැදිලිය. බොහෝ කාලයක් පුරාවට විද්‍යාඥයින් මේ ගැටලුවට පිලිතුරු සෙවීමට උත්සහ කොට ඇත. නමුත් මෑතක් වනතුරුම රාත්‍රී අහස අදුරු ඇයි යන ගැටලුවට නිශ්චිත පිළිතුරක් නොලැබුණි.

මෙහිදී පැහැදිලිව සදහන් කල යුතු කරුණක් වෙයි. එනම් ඔල්බර්ස් තමන්ගේ මේ විසංවාදය ඉදිරිපත් කරන්නේ 1826 වර්ෂයේදීයි. නමුත් රාත්‍රී අහස අදුරු ඇයි යන මේ ගැටලුව මතු කල ප්‍රථමයා ඔහු නොවෙයි. සමහර පොත්පත් වල සදහන් වන පරිදි, මේ ගැටලුවේ ඉතිහාසය 16 වන යුගය තරම් ඈතකට දිව යන්නකි. රාත්‍රී අහසේ අඳුරු බව යන ගැටලුව මතු කල ප්‍රථමයා ලෙස දැක්විය හැක්කේ 1576දී තෝමස් ඩිග්ස්(Thomas Digges) යන පුද්ගලයාය. ඔහුගේ මතයට අනුව තාරකා අතර අවකාශය අඳුරු ලෙස දිස් වන්නේ ඈතින්ම ඇති තාරකා වලින් එන අලෝකය ඉතා දුර්වල වන හෙයිනි. ඉන් පසු මේ ගැටලුව මුල්වරට තරමක් ගැබුරින් සාකච්චාවට බඳුන් කොට ඇත්තේ 1610දී ජොහැන්නස් කෙප්ලර් (Johannes Kepler) විසිනි. ඔහුගේ මතයට අනුව අහස අඳුරු ලෙස දිස් වන්නේ විශ්වය පරිමිත බැවිනි. ඉන් පසු 18 වන ශතවර්ශයේදී එඩ්මන්ඩ් හැලී(Edmund Halley) සහ Cheseaux විසින්ද මේ ගැටලුවම මතු කර ඇති බවට තොරතුරු ඇත. කෙසේ වෙතත් රාත්‍රී අහස අඳුරු ඇයි යන ගැටලුව පසු කලෙක ප්‍රසිද්ධ වූයේ ඔල්බර්ස්ගේ විසංවාදය නමිනි.1111

ඔල්බර්ස්ගේ විසංවාදය නිර්මාණය වී ඇත්තේ මූලික උපකල්පන 3ක් මත පිහිටාය. එනම් විශ්වය යනු වෙනස් වීමක් නැති (ස්ථාවර), අපරිමිත ලෙස පැතිර පවත්නා සහ ඒ තුල තාරකා ඒකාකාරීව විසිරී ඇති යන උපකල්පනයන්ය. අප වෙසෙන පෘථිවියේ සිට R දුරකින් (අරයකින්) පැතිර පවතින මනංකල්පිත ගෝලයක් සලකමු. මෙම ගෝලයේ පිටත පෘෂ්ඨයේ ඝණකම හෙවත් පළල a ලෙස ගනිමු. පිටත පෘශ්ඨ කොටසේ පරිමාව ආසන්න වශයෙන් 4πR2a ලෙස ගත හැක(මෙහිදී ගෝලයේ පෘශ්ඨ වර්ගපලය ගණනය කිරීමේ පහසුව සදහා තිරස් ලෙස පැතිර ඇතැයි උපකල්පනය කොට ඇත). ඉහත රූපය-1 හි O ලක්ෂයෙන් පෘථිවිය ද ඊට එපිටින් පෙර සදහන් කල ආකාරයට නිර්මාණය කල හැකි ගෝලයන් දෙකක් A හා B ලෙස දැක්වේ. ඒකක වර්ගඵලයක් තුල පවතින තාරකා ප්‍රමාණය N ලෙස ගත් විට මෙම මනංකල්පිත ගෝලය වටා ඇති තාරකා ප්‍රමාණය 4πR2aN වන බව පැහැදිලිය.

තේරුම් ගැනීමේ පහසුව සදහා විශ්වයේ සියලු තාරකා එකම දීප්තියකින් යුක්ත හා එහි අගය L ලෙස ගනිමු. මෙවැනි එක් තාරකාවක් සියලු දිශාවන් කරා අලෝකය හෙවත් විකිරණ විහිදුවනු ලබයි. මෙවැනි තාරකාවක සිට පෘථිවියට පවතින දුර ආසන්න වශයෙන් R වන බැවින් තාරකාවේ සිට O ලක්ශය හෙවත් පෘථිවිය හරහා යන දුර R වන ගෝලයක් නිර්මාණය කලහොත් පෘථිවිය හරහා ඒකක වර්ගඵලයක් තුලින් යන විකිරණ ප්‍රමාණය L/4πR2 වේ. මේ අගය ගෝලය පිටත පෘශ්ටය වටා පවතින තාරකා ප්‍රමාණයෙන් ගුණ කල විට ලැබෙන පිලිතුර LNa කි. එම නිසා මෙයින් පැහැදිලි වන්නේ මේ ගෝලය වටා පවතින තාරකා මගින් පෘථිවිය වෙත ලැබෙන මුලු විකිරණ ප්‍රමාණය LNa වන බවයි.

විශ්වය අපරිමිත යැයි උපකල්පනය කල බැවින් මෙවැනි ආකාරයේ රූපය-1 හි දැක්වෙන්නාක් මෙන් A හා B ආදී ගෝලයන් අපරිමිත ප්‍රමාණයක් අපට නිර්මාණය කල හැකිය. මේ නිසා මේ සියල්ලන්ගෙන්ම ලැබෙන ආලෝකය රාත්‍රී අහසේ අදුරු බව මකා දැමීමට තරම් ප්‍රබල වේ. ඔල්බර්ස් ඉදිරිපත් කල තර්කය මෙයයි.

ඈතින් ඇති තාරකා දිස් වන්නේ අඩු දීප්තියකිනි. මේ නිසා රාත්‍රී අහස අදුරු වන්නේ ඈතින්ම ඇති තාරකා වලින් ලැබෙන ආලෝකය නොගෙනිය හැකි තරම් දුර්වල වන නිසා නොවේදැයි ඔබට එක් වරම සිතෙනු ඇත. නමුත් ඔල්බර්ස්ගේ විසංවාදය දෙස තරමක් ගැබුරින් බැලූ කල තාරකා වලට ඇති දුර බලනොපාන බව පැහැදිලි වනු ඇත. මන්ද යත් අරය වැඩි වීමේදී නිර්මාණය වන ගෝලයන්ගේ ප්‍රමාණයද විශාල වේ. මේ අනුව බලන කල දුර වැඩි වීමේදී තාරකාවල දීප්තිය අඩු වූවත් එම අදාල ගෝලය අවට ඇති තාරකා ගණනද ඊට අනුලෝමව වැඩි වේ. මේ නිසා අප මනංකල්පිතව නිර්මාණය කරන සෑම ගෝලයකින්ම ලැබෙන අලෝක ප්‍රමාණය එකම වේ. ඉහත ගනණය කිරීමට අනුව මේ නිය‍ත අගයකි.

ඔල්බර්ස්ගේ විසංවාදය ඉදිරිපත් වූ කාලය මිනිසා විශ්වය පිළිබදව අද යුගය මෙන් බොහෝ දේ නොදැන සිටි කාලයකි. මේ නිසා විසංවාදය තුල ආලෝක මූලයන් ලෙස සදහන් වන්නේ තාරකා පමණි. නමුත් අද අප දන්නා පරිදි අහසේ අපට දර්ශණය වන සියලු තාරකා අප ක්ශීරපථ මන්දාකිණියට අයත් ඒවා වේ. අප මන්දාකිණියට එපිටින් තාරකා පවතිනුයේ තාරකා පොකුරු හෙවත් මන්දාකිණි ලෙසිනි. මේ නිසා ඔල්බර්ස්ගේ විසංවාදය අද යුගයේදී කථා කරන විට එහි ආලෝක මූලයන් විය යුත්තේ තාරකා පමණක් නොව තාරකා හා මන්දාකිණි යන දෙකම බව විශේෂයෙන් සදහන් කල යුතුය.ඔල්බර්ස් ගේ තර්කය ඉතා සුපරික්ශාකාරීව විමසා බැලූ විට එහි යම් අඩුපාඩුවක් සිදු වී ඇති බව පෙනෙනු ඇත. එනම් ලගින් පිහිටන තාරකා හෝ මන්දාකිණි මගින් ඈත තාරකා (මන්දාකිණි)වසා දැමීමයි. මේ නිසා තාරකා පිහිටන ගෝල අපරිමිතව නිර්මාණය කලත් එයින් අහසේ දීප්තිමත් බව සදහා වැදගත් වනුයේ පරිමිත අගයකි. නමුත් මෙහිදීද සම්පූර්ණ අහසම තාරකා හා මන්දාකිණි වලින් වැසී යන බැවින් එය විසංවාදය බිද දැමීමට හේතු වන්නක් නොවේ.

විවිධ අදහස්.. රාත්‍රී අහස අදුරු ඇයි යන ගැටලුවට ඈත අතීතයේ සිටම විවිධ ආකාරයේ අදහස් විවිධ පුද්ගලයින් විසින් ඉදිරිපත් කෙරිණි. ඒවායින් බොහොමයක් ප්‍රතික්ශේප වේ. පහත දැක්වෙනුයේ මෙවැනි ආකාරයේ පිලිතුරුය.

විශ්වයේ ඇති වායු වලාවන් මගින් ඈත තාරකා හා මන්දාකිණි අවහිර කරනු ලබයි. මෙය එක්වරම පිලිතුරක් ලෙස පෙනුනත් මෙය පිලිගත හැකි අදහසක් නොවේ. මන්ද යත් අන්තර්තාරීය මාධ්‍යය (දුහුවිලි සහ වායු වලාවන්) විකිරණ උරාගෙන ඒවා බැබලීමට පටන් ගන්නා හෙයිනි.

ඔල්බර්ස්ගේ විසංවාදය නිර්මාණය වී ඇත්තේ විශ්වය අපරිමිත යන උපකල්පණය මත පිහිටාය. නමුත් මහා පිපුරුම් වාදයට(Big Bang theory) අනුව විශ්වය පරිමිත විය යුතු බව පැහැදිලි වේ. මේ නිසා අපට දිස් වනුයේ මේ පරිමිත අවකාශය තුල පවතින ආලෝක මූලයන් පමණි. මෙය මේ ගැටලුවට යම්තාක් දුරට පිලිගත හැකි පිලිතුරක් උනත් නියම පිලිතුර නොවේ.

මෙන්න මේකයි හේතුව.. ඈතින්ම පිහිටන සමහර තාරකා වල ආලෝකය තවමත් අප වෙත ලැබී නොමැත. ඉතා විශාල වේගයකින් ආලෝකය ගමන් කරත් විශ්වයේ විශාලත්වය අනුව බොහෝ ඈතින් ඇති මන්දාකිණිවල අලෝකය අප වෙත තවමත් ලැබී නොතිබීමට හැකියාවක් පවතී. බොහෝ දෙනා පිලිගන්නා ආකාරයට විශ්වයේ උපත සිදුවී ඇත්තේ මහා පිපුරුම් වාදයට අනුවය. ඒ අනුව විශ්වයේ වයස දල වශයෙන් අවුරුදු බිලියන 15 පමණ වේ. මේ හේතුවෙන් අපට පෙනෙනුයේ ආලෝක වර්ෂ බිලියන 15 ක පරාසය තුල ඇති විශ්වය පමණි. මෙය ‘නිරීක්ෂිත විශ්වය’ (Observable universe) ලෙසද හැදින් වේ. මෙය රාත්‍රී අහසේ අඳුරු බව සදහා පිලිගත හැකි ප්‍රභල පිළිතුරකි.

හබල් නියමයට අනුව විශ්වය යනු නියතව පවතින්නක් නොව කාලයත් සමග ප්‍රසාර‍ණය වන්නකි. මේ නිසා යම් මන්දාකිණි දෙකක් අතර දුර කාලයත් සමග වැඩි වනු ඇත. පෘථිවියේ සිට අප දකින සියලුම මන්දාකිණි අපෙන් ඈත්වෙමින් පවතී. හබල් නියමයෙන් පෙන්වා දෙන්නේ මන්දාකිනියකට ඇති දුර වැඩි වන විට එය ඈත්වෙන වෙගයද ඊට අනුලෝමව වැඩි වන බවයි. ඩොප්ලර් ආචරන මූලධර්මයට අනුව ඈත් වෙමින් ඇති මන්දාකිණිවල ආලෝකය අපට ලැබෙනුයේ රක්ත විස්තාපනයට (redshift) ලක්වය. එනම් මන්දාකිණියෙන් පිටවන ආලෝකයේ සංඛ්‍යාතය නියම අගයට වඩා අඩුවය. මේ නිසා බොහෝ ඈතින් ඇති මන්දාකිණි වල ආලෝකය ඉතා දැඩි ලෙස රක්ත විස්තාපනයට ලක්ව විද්‍යත් චුම්භක වර්ණාවලියේ දෘශ්‍ය කලාපයෙන් බැහැරට යාම නිසා අපට නොපෙනී යයි. මෙයද ඔල්බර්ස් විසංවාදය බිද දමන ප්‍රබල පිළිතුරකි.

ඉහත සදහන් කල අදහස් වලින් රාත්‍රී අහස අඳුරු වීමට ප්‍රබල ලෙසම බලපානුයේ අවසාන වශයෙන් සදහන් කල කරුණු දෙකය. රාත්‍රී අහස අඳුරු ඇයි යන ගැටලුව සමාන්‍යය තාරකා විද්‍යාවේ එන සරල ඒවාගේම ප්‍රබල ගැටලුවකි. නමුත් එයට පිළිතුරු දිය යුතු වන්නේ සාමානය තාරකා විද්‍යාවෙන් නොව Cosmology හෙවත් විශ්ව න්‍යාය විද්‍යාවෙනි.

බුරියට හැදෙන ලෙඩ

බුරිය හෙවත් නාභිය ගැන ගොඩක් දෙනෙක් හිතාගෙන ඉන්නේ සහ දන්නේ එතරම් ශරීරයට වැදගත් නැත් කොටසක් විදිහට. ඒත් දරුවෙක් ගර්භාෂය තුලදී මවගේ ශරීරයට එක්ක ප්‍රධාන වශයෙන්ම බැඳෙන්නේ මේ නාභිය හරහා දිවෙන පෙකිණි වැල එක්කයි.

දරුවෙක් ඉපදිලා ටික දවසකින් මේ පෙකිණිවැලේ ඉතිරි කොටස හැලීයනවා. ඇතැම් දරුවන්ට මේ පෙකිණිය පැසවීම නිසා ආසාදන තත්වයන් ඇතිවෙන්න පුළුවන්, එහෙමත් නැත්නම් මද උණ ගතියක් වුවත් ඇතිවෙන්න පුළුවන්. ඒ නිසාම අලුත් උපන් දරුවන්ගේ බුරිය සම්බන්ධයෙන් දෙමව්පියන් දක්වන්නේ වැඩි අවධානයක්. ඊට අමතරව වැඩුණු පුද්ගලයන්ටත් බුරිය ආශ්‍රිතව විවිධ රෝග ඇතිවෙන්න පුළුවන්. ඒ නිසා ඔබ මේ ගැන අවධානයෙන් ඉන්න එක ඉතාම වැදගත්.

ඇතැම් පුද්ගලයන්ගේ බුරියෙන් අවර්ණ හෝ සුදු පැහැති ශ්‍රාවයන් නිතරම පිටවීම සිදුවෙන්න පුළුවන්. මේක බැක්ටීරියා ආසාදන හෝ ඊස්ට් නිසා ඇතිවෙන ආසාදන තත්වයක් වෙන්න පුළුවන්. නිසිපරිදි ස්නානය කිරීමේදී බුරිය සේදීම සහ එහි අභ්‍යන්තරයේ කුණු ඉවත් නොකිරීම නිසා බැක්ටීරියා, කුණු, දුහුවිලි එක්වෙලා බුරිය ඇතුලේ ආසාදනයක් වෙන්න පුළුවන්. මෙහි ප්‍රතිඵලයක් විදිහට සැරව වැනි ද්‍රාවණයක් බුරියෙන් පිටවීම සිදුවෙනවා. මේක ප්‍රතිකාර ගතයුතු තත්වයක්.

තවත් දෙයක් තමයි ඇතැම් කාන්තාවන් වගේම පුරුෂයෙන් නිවසේදී කෙටි උඩු ඇඳුම් සහිතව සිටින අවස්ථාවලදි බුරියට විවිධ කෘමී සතුන් ඇතුල්වෙන්න පුළුවන්. විශේෂයෙන්ම සුරතල් සතුන් ඉන්න ගෙවල්වල. ඇඳේ නිදාගන්න අවස්ථාවලදි මේ කුඩා සතුන් ඔබේ බුරියට ඇතුල්වෙලා එහි පදිංචි වෙන්න පුළුවන්. ඇතැම්විට බුරිය ඇතුල සපාකෑම නිසා තුවාල ඇතිවිය හැකියි. මැක්කෝ හෝ කිනිතුල්ලන් වගේම මකුණන් ඔබේ බුරියට රිංගුවොත් එහෙම වැඩේ බොහොම බරපතලයි. ඒ නිසා සුරතල් සතුන් එක්ක විනෝද වෙද්දි බුරිය පරිස්සම් කරගන්න.

ඇතැම් කාන්තාවන්ගේ වගේම පුරුෂයන්ගේ බුරිය ටිකක් ගැඹුරට පිහිටන්න පුළුවන්. එහෙම වෙද්දි බුරිය ඇතුලේ ඔබ ශරීයේ ගල්වන පවුඩර්, සබන් වගේ ද්‍රාවණ දීර්ඝ කාලයක් තිස්සේ තැන්පත්වෙලා ඒවා ප්‍රතික්‍රියා කරලා බුරිය අභ්‍යන්තරය තුවාලවීම නැත්නම් ඉදිමීම වෙන්න පුළුවන්. මේ විදියට බුරිය ටිකක් ගැඹුරු අය නාන වෙලාවට ටිකක් හොඳින් බුරිය පිරිසිදු කරගන්න. මේකට තෙත පුළුල් කැබැල්ලක් හෝ කොට්න් බට් එකක් පාවිච්චි කරන්න පුළුවන්.

බුරියෙන් රුධිරය පිටවීම portal hypertension හෝ primary umbilical endometriosis කියන රෝගී තත්වයන් හෝ ආසාදන නිසා සිදුවෙන්න පුළුවන්. මේක වහාම වෛද්‍යවරයෙක් හමුවිය යුතු තත්වයක්. මෙන්න මේ වගේ සඳහන් කරපු වගේම සඳහන් කරන්න අතපසු වුණු රෝගී තත්ව ගණනාවක් ඔබේ හුරතල් බුරියට ඇතිවෙන්න පුළුවන්. ඒ නිසා බොහොම පරිස්සමින් බුරිය රැක බලාගන්න එක වගේම අවශ්‍ය අවස්ථාවකදී ඉක්මණින්ම වෛද්‍යවරයෙක් හමුවෙන එක තමයි හොඳම දේ.

ආදරවන්තිය දිනාගන්න ක්‍රමයක්

ආදරේ කියන්නේ හරි පුදුම දෙයක්. ඒක ඇතිවෙන වෙලාව, දැනෙන වෙලාව කොයි වෙලාවද කියන්න සක්කරයාවත් දන්නේ නැතිව ඇති. ඒ තරමටම අපූර්වතම හැඟීමක් තමයි ආදරේ කියලා කියන්නේ. ඒ හැඟීම කෙනෙක් සම්බන්ධයෙන් දැනෙන්න පටන්ගත්තාම ඒ කෙනා තමන්ගේ ජීවිතේ කොටසක් කරගන්න ඇතිවෙන අරමුණ එක්ක තමයි ප්‍රේම සම්බන්ධයක් නිර්මාණය වෙන්නේ.

බොහෝ පිරිමින් ආදරේදී ක්‍රියා කරන විදිහ කාන්තාවන්ට සාපේක්ෂව ඉතාම වෙනස්. මේ නිසාම පිරිමි ආදරේ කරන්න පටන්ගත්තම ලැබෙන දේවල්වලට වඩා නොලැබෙන දේවල් වැඩියි කිව්වොත් නිවැරදියි. ගොඩක් පිරිමින්ට තියන ප්‍රශ්නයක් තමයි තමන්ගේ හිත ගියපු ආදරවන්තියව දිනාගන්නේ කොහොමද කියන එක. ඉස්සර වගේ නෙවෙයි දැන් ලෝකේ, ගෑණු ළමයි ඇඹරි ඇඹරි ගේ මුල්ලට වෙලා ඉන්නේ නෑ. දැන් ඔවුන්ට තීරණ ගන්න තියන නිදහස වැඩියි. ඒ තීරණ වලට ගොඩක් අවස්ථාවලදී ලැබෙන අවස්ථාවත් වැඩියි. ඒ නිසාම ඉස්සර වගේ එක ආදර හසුනකින්, එක හිනාවකින් ගෑණු ළමයෙක්ගේ හිත දිනාගන්න එක ලේසි පහසු නෑ.

අනිත් එක එක හිනාවකින් දපනේ වැටෙන ගෑණු ළමයි හරි සිල්ලරයි මේ තියන සමාජ ක්‍රමය ඇතුලේ. දැන් ඉන්න ගෑණු ළමයින්ගේ දැනුම, හැකියාවන්, වුවමනාවන්, ඉලක්ක හරි පුළුල්. ඒ නිසා ඒ වගේ ගෑණු ළමයෙක් කියන්නේ පවුලකට, තවත් ගෙදරකට, තවත් හිතකට පුදුමාකාර ශක්තියක්. හැබැයි එහෙම ගැණු ළමයෙක් දිනාගන්න ලේසි නෑ. අද සමාජයේ ඉන්න කලින් කියපු විදිහේ වටිනකියන ගෑණු ළමයෙක් ආදරෙන් දිනාගන්න නම් පිරිමි පාර්ශවයට සෑහෙන්න වෙනස් වෙන්න වෙනවා. මුලින්ම ඒ වගේ ගෑණු ළමයෙක්ගේ හිත දිනාගන්නනම් පිරිමි කෙනෙක්ගේ ජීවිතයේ මෙන්න මේ දේවල් තියනවද කියලා හිතලා බලන්න.

ආර්ථික ස්වාධීනත්වයක්, ඒ කියන්නේ තමන්ගෙම කියලා ආදායම් මාර්ගයක්. ඉන්න හිටින්න තැනක්, නැත්නම් එහෙම තැනක් සම්බන්ධයෙන් හොඳ ඉලක්කයක්. පොතේ පතේ දැනුමට වඩා සමාජය ගැන අවබෝධයක්. විවෘතව කතාකරන පුරුද්දක්. පටු මිත්‍යා, අන්තවාදී මත වෙනුවට මානුෂීය සහ ආදරණිය දැක්මක්. නිවසේ කටයුතු සම්බන්ධයෙන් පුරුද්දක්. ඒ කියන්නේ වැඩ බෙදාගෙන කරන්න තියන කැමැත්තක්. සුන්දර හිත නිවන විනෝදාංශයක් හෝ කීපයක්. ආදරය සෙනෙහස නොසඟවා ප්‍රකාශ කරන්න අවශ්‍ය ධෛර්යයක්. පිළිවෙල සහ පිරිසිදුකම. මත්පැන් සහ දුම්වැටි වලින් තොරවීම. නැත්නම් භාවිතය අවම වීම. ජීවිතයේ පැහැදිලි ඉලක්ක තිබීම.

ඉතින් මේවා ජීවිතේ ගෑවිලාවත් නැති පිරිමි උදවිය මේ ලිපිය කියවනවනම් හොඳම දේ හිතගියපු ආදරවන්තිය කලින් අපි කියපු ජීවිතේට ශක්තියක් වෙන්න පුළුවන් වටිනා පෙම්වතියක් නම් මෙතනින එහා ලිපිය කියවන්නේ නැතිව අතෑරලා දාන එක. නැත්නම් ඉහත සඳහන් කරපු දේවල් අද ඉඳන්වත් හදාගන්න උත්සහ කරන එක. මොකද මෙහෙම නොවන කොල්ලන්ට ඒ වගේ කෙල්ලෝ පැහැදිලිවම කැමති වෙන්නේ නෑ. ඒක ස්ථීරයි. හැබැයි මේ කියපු දේවල් අඩුවැඩි වශයෙන් පිරිමියෙක් තුල තියනවනම් මෙන්න මේ දේවල් තුලින් ඔබගේ හිත ගියපු ඒ ගෑණු ළමයට ලංවෙන්න සහ ඇයව දිනාගන්න පුළුවන්.

පුරසාරම් බොරු කියනවා වෙනුවට ඇය ඉදිරියේ ඇත්ත ඇති සැටියෙන් කියන්න. පැණි සෙවල හලනවා වෙනුවට (හේතුවක් නැතිව පස්සේන යනවා වෙනුවට) කෙලින් ගිහින් ඇය එක්ක කතා කරන්න. සංවේදීව ආදරේ කරන්න, ආදරේ කරන විදිහ ඇතුලේ බොළඳකම් වලට ඕනම කෙල්ලෙක් කැමතියි. ඔබ සතුව තියන ශක්තීන් වගේම දුර්වලතාත් පෙන්වලා දෙන්න, අනාගත ඉලක්ක ගැනත් ඇයට කියන්න. ඇයගේ අනාගතය ගැන ඇය එක්ක කතාකරන්න, ඇයගේ සැලසුම් වලට දෙන්න පුළුවන් දායකත්වය තීරණය කරලා ඇයට ඒ ගැන කියන්න. ඇයගේ පැසසිය යුතුදේ අවංකව ප්‍රශංසා කරන්න. එහෙම නැතිදේවල් හදාගන්න උදව් කරන්න. ඇගයීම කියන්නේ කාන්තාවක් උසස් කොට සැලකීමක්. ඔබගේ නිර්මාණාත්මක හැකියාවන් කියන්නේ ආදරණීය ගෑණු හිතක් පිස්සුවට්ටන්න පුළුවන් ක්‍රමයක්.

සාහිත්‍ය කලාවට ඔබේ ඇති රුචිය සහ ඔබේ රසවිඳීම් ඇය එක්ක බෙදාගන්න. කොටුවෙලා ඉන්නවා වෙනුවට ඇවිදින්න, රස්තියාදුවක් යන්න ඇයට කතාකරන්න. හැබැයි කාමරයකට එක්කගෙන යන්න හදිස්සි වෙනවා වෙනුවට. ඇයගේ දෙමව්පියන් එක්ක යහපත් සබඳතාවයක් ගොඩනගාගන්න. ඇයගේ පවුලේ සහෝදර සහෝදරියන්, ඥාතීන් ඉදිරියේ පොරක් වෙනවා වෙනුවට ඔවුන් හා සම සහෝදරයෙක්, හිතවතෙක් වෙන්න උත්සහ කරන්න. ඒක ඔබ ආදරේ කරන ඇයට විශාල රුකුලක් ඔබව ජීවිතේට එකතුකරගන්න. විශ්වාස කරන්න පුළුවන් කෙනෙක් වෙන්න. කියන දේ කරන්න, කරන දේ කියන්න.

අනවශ්‍ය දේවල් වලට බොරු වියදම් කරනවා වෙනුවට අරපිරිමැස්මෙන් ජීවිතේ ගෙවන්න.
මේ දේවල් ඔබට පුළුවන්නම් ඔබේ රාජධානියේ රැජින වෙන්න ඕනම වටිනකියන කෙල්ලෙක් අකමැතිවෙන්නේ නෑ. ඒක ස්ථීරයි.

මිතුරි කියන්නේ මොනවද?

මිතුරි ගැන ඔබ හැමෝම අහලා ඇති. සමහරු හොඳින් දන්නවා ඇති සහ සමහරු කිසිම දෙයක් නොදන්නවාත් ඇති. කාන්තාවන් පවා ඇතැම්විට මේ ‘මිතුරි’ නාමය රහසක් විදිහට තියාගෙන ඉන්න නිසා පොදුවේ කතාවෙනවත් අඩුයි. ඒත් වචනයේ පරිසමාප්ත අර්ථයෙන්ම මිතුරි කියන්නේ කාන්තාවන්ට විතරක්ම නෙවෙයි අඹුසැමි දෙපලටම හොඳ “මිතුරියක්”

ඇයි එහෙම කියන්නේ කියන එක ගැන අපි කතාකරමු. ‘මිතුරි’ (Mithuri) කියන්නේ ලංකාව තුල අලෙවිවන උපත් පාලන ගිලින පෙති වර්ගයක්. ඒ කියන්නේ පවුල් සැලසුම් සඳහා භාවිතා කරන කාන්තාවන් වෙනුවෙන් පමණක් සකස් කෙරුණු ගිලින පෙති වර්ගයක් (පිරිමින් කිසිසේත්ම භාවිතා නොකල යුතුයි). මෙය හඳුන්වන්නේ Combined Oral Contraceptive Pill එකක් කියලා. ඒ කියන්නේ හෝමෝන වර්ග කිහිපයක එකතුවකින් තමයි මෙය සකස් කරලා තියෙන්නේ. ජර්මනියේ සුප්‍රසිද්ධ Bayer සමාගමේ නිශ්පාදනයන් නිසා ‘මිතුරි’ වල ගුණත්වය ගැන කිසි ගැටළුවක් නෑ. ලංකාව තුල මෙය ‘මිතුරි’ කියන සන්නම් නාමයෙන් අලෙවි කරන එකම නියෝජිතයා වන්නේ ශ්‍රී ලංකා පවුල් සංවිධාන සංගමයේ අලෙවිකරණ අංශයයි.

මිතුරි කාටද? මේ නිෂ්පාදනය වැදගත් වෙන්නේ විවාහ වී දරුවන් ලැබීම පමා කිරීමට අවශ්‍ය පවුල්වලට සහ දරුවන් අතරේ පරතරයක් තබාගැනීමට අවශ්‍ය පවුල්වලටයි. මෙහිදී කාන්තාවන් වෙනුවෙන් මෙම පෙත්ත නිෂ්පාදනය කර තිබෙනවා.

විශේෂත්වය කුමක්ද? ඉතා ඵලදායී උපත් පාලන ක්‍රමයක් වන අතර 99%ක් දෙනෙක්ට සාර්ථක ප්‍රතිඵල අත්කරගත හැකියි. ඒ කියන්නේ ඉඳහිට මෙය සාර්ථක නොවන අයට සිටිය හැකියි කියන එකයි. ආරක්ෂා සහිත ක්‍රමයක්, ශරීරයට අහිතිකර නැති අමුද්‍රව්‍ය වලින් නිෂ්පාදිත පෙති වර්ගයකි.
මිලෙන් අඩුවීම. පහසුවෙන් භාවිතා කල හැකියි. අතුරු ආබාධ ඉතාම අඩුය.

පාවිච්චි කරන්නේ කොහොමද? මිතුරි කියන්නේ දිනපතා භාවිතයට ගතයුතු පෙති වර්ගයක්. ඔබට ලඟම තිබෙන ෆාමසියෙන්, වෛද්‍ය මධ්‍යස්ථානයෙන්, වෙළඳසලෙන් හෝ සුපිරි වෙළඳසැලෙන් ‘මිතුරි’ පෙති පැකට්ටුවක් ලබාගන්න පුළුවන්. මේවා මිලදී ගන්න වෛද්‍යවරයෙක්ගේ නිර්දේශයක් අවශ්‍ය වෙන්නේ නෑ. එක් පැකට්ටුවක පෙති 28ක් අඩංගුයි. එයින් පෙති 21ක් කහපැහැති වන අතරේ පෙති 7ක් දුඹුරු පැහැයෙන් යුක්ත වෙනවා. කහපැහැති පෙති හෝමෝන පෙතිවන අතර, දුඹුරු පැහැති පෙති යකඩ පෙති ලෙස හඳුන්වනවා.

භාවිතයට ගන්නා ආකාරය තමයි කාන්තාවට මාසික ශුද්ධිය (ආර්තවය) සිදුවන පළමු දිනයේදී (හෝ මුල් දින 5 ඇතුලත, පළමු දිනයේනම් ඉතාම හොඳයි) පෙති පැකට්ටුවේ මුල්ම කහපැහැති පෙත්ත රාත්‍රීි ආහාරයෙන් පස්සේ ගන්න. ඊට පස්සේ හැමදාම එකම වෙලාවක එක පෙත්ත බැගින් ගන්න. හදිස්සියේවත් එක දවසක් බොන්න අමතක වුනොත් ඊළඟ දවසේ පෙති දෙකක් එකවර ගන්න. දවස් දෙකක් පිට පිටම බොන්න අමතක වුනොත් ඊට පස්සේ දවස් දෙකේ දවසක පෙති දෙක බැගින් එකම වෙලාවකදි ගන්න (ඒ වගේම නැවත ආර්තවය සිදුවෙන තුරු ලිංගිකව එක්වීමේදී කොන්ඩම් භාවිතා කරන්න)

මිතුරි භාවිතයට ගන්න කලින් මේ දේවල් ගැනත් හිතන්න? දීර්ඝ කාලීනව පවතින දරුණු හිස කැක්කුම්, වමනය, උණ හෝ අධික සෙම්ප්‍රතිශ්‍යාව වැනි රෝග පවතිනවනම්, මව්කිරි දෙන කාන්තාවක් නම්, වෙනත් දරුණු රෝගී තත්වයකින් හෝ සැත්මකමට භාජනය කර ඇති කෙනෙක් නම්, භාවිතයට කලින් අනිවාර්යයෙන්ම වෛද්‍ය උපදෙස් ලබාගන්න.,

හරි මිතුරි පෙති භාවිතයට ගත්තට පස්සේ? හරියට පෙති පැකට්ටුවේ සඳහන් වෙන ඊතලයේ අනුපිලිවෙලට පෙති පාවිච්චි කරන්න. කහපෙති ඉවරවෙලා දුඹුරු පෙති භාවිතයට ගනිද්දි කාන්තා ඔබට ආර්තවය සිදුවේවි. දුඹුරු පෙති ඉවරවෙද්දිම ආයෙත් අලුත් පැකට්ටුවක් අරගෙන කහපැහැති පෙත්තේ ඉඳන් පටන්ගෙන මිතුරු පාවිච්චි කරන්න. මේ විදිහට දිගටම භාවිත කරන්න ඔබට පුළුවන්. ඒ කියන්නේ මිතුරි භාවිත කරන කාලයේ ඔබ කොන්ඩම් භාවිත කිරීම අවශ්‍ය වෙන්නේ නෑ. අනාරක්ෂිතව ලිංගිකව එක්වුනා කියලා ගැබ්ගැනීමක් සිදුවෙන්නේ නෑ. මොකද මිතුරි පෙත්ත විසින් ගැබ්ගැනීම තාවකාලිකව වලක්වනවා. හැබැයි මේ පෙතිවලින් ලිංගිකව සංසරණය වෙන රෝගවලින් නම් ඔබට ආරක්ෂාවක් ලැබෙන්නේ නෑ.

අතුරු ප්‍රතිඵල තියනවද? භාවිත කරන අතරවාරයේදී බොහොමයක් කාන්තාවන්ට කිසිඳු අතුරු ප්‍රතිඵලයක් ඇතිවෙන්නේ නෑ. ඒත් කලාතුරකින් වමනය, පියයුරු වේදනාව, හිසකැක්කුම වගේ තත්වයක් ඇතිවුනොත් දවසක් දෙකකට පස්සේ එය සාමාන්‍ය තත්වයට පත්විය හැකියි. ඊට වඩා කාලයක් මේ රෝග ලක්ෂණ තිබෙනවනම් වහාම වෛද්‍යවරයෙක් හමුවිය යුතුයි. ඒ වගේම යම් කිසි අවස්තාවක අසාමාන්‍ය විදිහට ඔබගේ යෝනියෙන් රුධිරය පිටවෙනවනම් වෛද්‍යවරයෙක් හමුවීම සුදුසුයි. නමුත් අති බහුතරයක් කාන්තාවන්ට මිතුරි කියන්නේ අතිශය සාමාන්‍ය කිසිම අතුරු ආබාධයක් නැති පෙත්තක්.

නතර කරන්න ඕන කවදද? ඔබ මිතුරි පෙති භාවිතයට ගනිද්දි ඔබේ සැමියාත් දැනුවත් කරලා තියන එක ඉතා වැදගත්. ඒ වගේම අපි කලින් කිව්වා මේක දරු ප්‍රසූතිය පමා කරන සහ ප්‍රසූති දෙකක් අතර කාල සීමාව පවත්වාගන්නා තාවකාලික උපත් පාලන ක්‍රමයක් පමණයි. ඔබට දරුවෙක් අවශ්‍ය ඕනම මොහොතක පෙති ගැනීම නතරකරලා කොන්ඩම් භාවිත නොකර ලිංගිකව එක්වීමෙන් ගැබ්ගැනීම සිදුවෙනවා. ඒ වගේම ආයෙත් දරුවෙක් බිහිවුණාට පස්සේ ඔබට අවශ්‍ය මොහොතක මිතුරි භාවිතයට ගැනීමට හැකියාව ලැබෙනවා. ඒ වගේම වයස අවුරුදු 40-50 අතර කාලයේදී කාන්තාවකගේ ආර්තවය නතරවීම (Menopause) සිදුවුණාට පස්සේ මිතුරි පෙති භාවිතයට ගැනීම අවශ්‍ය වෙන්නේ නෑ.

මිතුරි වලින් මහත් වෙනවද? මේක වැරදි මතයක්. ඇත්තටම මිතුරු පෙති භාවිතයට ගනිද්දි කාන්තාවගේ ආර්තව චක්‍රය ක්‍රමවත් වෙනවා. අක්‍රමවත් ආර්තව චක්‍රයක් තියන කාන්තාවන්ගේ ආර්තවය ක්‍රමවත් කරන්නත් පිළියමක් ලෙස මිතුරි භාවිත වෙනවා. ඒ නිසා මේ විදිහට ආර්තවය ක්‍රමවත් වෙද්දී ආහාර ගැනීමේ හැකියාව සහ රුචිකත්වය වැඩිවෙනවා. ඉතින් එහෙම වෙද්දි සීමාවක් නැතිව කෑම ගත්තොත් ඉතින් ඕනම කෙනෙක් මහත් වෙනවා. මිතුරි කියන්නේ සාපේක්ෂව ඉතා හොඳ තාවකාලික පවුල් සැලසුම් ක්‍රමයක්. හැබැයි දීර්ඝකාලීනව භාවිතා කරනවනම් මීට වඩා හොඳ එන්නත්, ජඩෙල්, ලූප් වගේ ක්‍රම තිබෙනවා. ඒ ගැනත් අපි ඉදිරියට කියන්නම්. හැබැයි බයක් සැකක් නැතිව ඕනෑම පවුලකට ගැලපෙන උපත් පාලන ක්‍රමයක් විදිහට මිතුරි නම් කරන්න පුළුවන්. වැඩිදුර තොරතුරු ඔබට ශ්‍රී ලංකා පවුල් සංවිධාන සංගමයෙන් දැනගන්නත් පුළුවන්.

අන් අය විවේචනය ඔබේ විනෝදාංශය ද?

පහුගිය දවසක පැවැත්වුණු විවාහයකට සහභාගීවෙන්න ගියපු වෙලාවේ අලුත් මිත්‍රයෙක් අඳුනගන්න ලැබුණු. මේ මිත්‍රයා තමන්ගේ විස්තර එහෙම කියලා ඇතිවුණු කතාබහ විවාහ උත්සවයේ කම්මැලිකම නැතිකරමින් ගලාගෙන ගියා. ඒත් ටික වෙලාවකින් මේ පුද්ගලයා පටන්ගත්තේ ලංකාවේ දේශපාලනය ගැන කතාවක්.

මේ කතාව ටික ටික ගලාගෙන යද්දි දේශපාලන චරිත විවේචනය කරන්න ඔහු පටන්ගත්තා, ඒක හරි රළු සහ අමිහිරි පදනම් විරහිත විවේචන බවට පත්වුණා. ඇත්තටම ඒවා විවේචනවලටත් වඩා දෝශාරෝපණ සහ පළු අරින බැණුම්. තවත් ටිකකින් ඔහු තමන්ගේ ආයතනය සහ එහි සේවකයන්, පස්සේ ඔහුගේ පවුලේ සාමාජිකයන්, මිත්‍රයන් ගැන මේ විදිහටම විවේචනය කරන්න පටන්ගත්තා.

පුදුම වැඩේ කියන්නේ අන්තිමට එදා විවාහවුණ මනමාලයා සහ මනමාලිය පවා ඔහුගේ දැඩි විවේචනවලට, බැනුම් වලට භාජනය වුණා. අන්තිමට මට සිද්ධවුණේ එතනින් නැගිටලා වෙන තැනකට ගිහින් හොඳ හුස්මක් ගන්න. ඔබත් සමහරවිට මේ වගේම අනිත් අයව විවේචනය කරන එක පුරුද්දක් කරගත්ත, විවේචනය විනෝදාංශයක් කරගත්ත කෙනෙක් නම් ඔබට එහි ඇතුලාන්තය ගැන ඒ තරම් අවබෝධයක් නැතිව ඇති. ඒ නිසා මේ ලිපිය ඔබට වැදගත් වේවි. ගොඩක් දෙනෙක් මේ විදිහට අන් අයව දීර්ඝ කාලයක් තිස්සේ පුරුද්දක් විදිහට විවේචනය කිරීමට හේතු කීපයක් තිබෙනවා.

තමන්ගේ ජීවිතයේ ගතකරමින් ඇති කටුක අවධියක් සම්බන්ධයෙන් ඇති වෛරය, හිතට දැනෙන තරහා සහ ක්‍රෝධය පිටකරන මාර්ගයක් විදිහට, ජානමය වශයෙන් හෝ පවුල් පසුබිම ඇතුලේ නිර්දය විවේචනය කියන එක පොදු සාධකයක් වීම, ඔබ කරන රැකියාව, මෙන්න මේ හේතු නිසා ඔබත් විවේචනය විනෝදාංශය කරගත්ත කෙනෙක් නම් ඔබට නොදැනීම ඔබේ මිතුරන්, හිතවතුන් ඔබෙන් ඈත් වෙලා යනවා කියන එක ටික දවසකින් ඔබට තේරේවි. ඔබට විවිධ උත්සව අවස්ථා, වැදගත් අවස්ථාවලට ආරාධනා නොලැබෙනවා කියන එක ඔබට දැනෙන්න පටන්ගනීවි. ඔබත් එක්ක කතාකරන්න එන අය වචනයෙන් දෙකෙන් ෂේප් වෙලා යනවා කියලා ඔබට වැටහේවි. සමස්තයක් විදිහට ඔබව කොන්වෙමින් තිබෙනවා කියන එක තමයි මේ දේවල් වලින් පැහැදිලි වෙන්නේ.

විශේෂයෙන්ම මේ වගේ දකින දකින හැමදේම, හැම කෙනාවම සාධාරණ හේතුවක් නැතිව නිර්දය විදිහට විවේචනය කරන උදවියට කවුරුවත් උපදෙස් දෙන්න සහ උදව් කරන්න පෙළඹෙන්නෙත් නෑ.

“ඔය මනුස්සයට තියෙන්නේ මහ කාළකණ්ණි කටක්..කිව්වොත් ආඩපාලියක් තමයි… ඔය ගෑණිට කිසි කෙනෙක්ව පේන්න බෑ.. හැම මනුස්සයගෙම වැරදි විතරයි පෙන්නේ..කිසි ගුණයක් නෑ” මෙන්න මේ විදිහට සමාජමය හැඳින්වීමක් ඔබ ඇති තැන්වලට වඩා නැති තැන්වලදි ඔබව විස්තර කරන්න පාවිච්චි කරනවනම් ඒක ඉතාම නරක තත්වයක්. මෙහෙම වෙලා තියෙන්නේ ඔබේ විනෝදාංශයක් හරි පුරුද්දක් විදිහට හරි කරගෙන යන අසාමාන්‍ය විවේචනය නිසයි.

නරකම තත්වය තමයි දිගින් දිගටම ඔබ මේ විදිහට විවේචනය කරන්න පටන්ගත්තම ඒක මානසික ව්‍යාධියක් දක්වා ගමන් කරනවා. පස්සේ ඔබ ඔබවම විවේචනය කරන්න ගන්නවා. ඔබ කරන කිසිම දෙයක් ඔබට වටින්නේ නැති වෙන්න පටන්ගන්නවා. එහෙම වුණාම ඔබ කරන කිසිම දේකින් ඔබව සෑහීමකට පත්වෙන්නේ නෑ. එකම වැඩේ දහපාරක් කරන්න වෙනවා. අන්තිමට ඔබ මෙයින් වෙහෙසට පත්වෙලා ඉච්ඡාභංගත්වයට පත්වෙනවා, ඔබ ඔබ ගැනම කළකිරෙන්න පටන්ගන්නවා.

ඉතින්..එතකොට නම් තත්වය ඉතාම නරකයි. ඇත්තටම විවේචනය කියන්නේ නරක දෙයක් නෙවෙයි. ඕනෑම ආගමික දර්ශනයක, ඉගැන්වීමක විවේචනය හොඳ දෙයක් විදිහට සලකනවා. ඒත් විවේචනයක් හොඳ වෙන්නනම් සිදුකරන විවේචනය සාධාරණ විය යුතුය, කාලීන විය යුතුයි, ප්‍රතිඵලදායක විය යුතුයි වගේම අදාල පුද්ගලයාට ගැලපෙන ආකාරයකින් විය යුතුයි. ඒ වගේම තමයි ඔබ කිසිවෙකු විවේචනය කරනවානම් ඔබත් නිහතමානීව ඔබ ගැන සිදුකරන විවේචන බාරගෙන නිවැරදි වෙන්න සූදානම් කෙනෙක් විය යුතුයි. බොහෝවෙලාවට මේ පුරුද්දකට විවේචනය කරන අශීලාචාර පුද්ගලයන්ගේ ගති ලක්ෂණ තමයි නිහතමානී නොවීම, ඉවසීම ඉතා අඩුවීම, විවේචනය කරන දේ සම්බන්ධව නිසි අවබෝධයක්නැතිවීම. සමාජයීය වශයෙන් වෛරයෙන් පසුවීම, ඉච්ඡාභංගත්වය,

හොඳ දේ තමයි බැරිම වෙලාවක ඇරෙන්න කිසිම කෙනෙක්ව, කිසිම දෙයක්ව විවේචනය කරන්න යන්න එපා. ඒ වගේම විවේචනය කරන්න කලින් ඔබම හිතලා බලන්න එහි ප්‍රතිඵල. පියවර කීපයක් ඉදිරියට හිතන්න. එතකොට අන්තිම ප්‍රතිඵලය හොඳවෙයි කියලා ඔබට හිතෙන්නේ නැත්නම් ඒ විවේචනය නොකර ඉන්න. විවේචනයක් කරන්න අවශ්‍යවෙන්නේ කටක් සහ වචන ටිකක් විතරයි හැබැයි ඵලදායී විවේචනයකට සහ මගපෙන්වීමකට ඔබට හොඳ පෞර්ශයක්, විනයක්, හික්මීමක් වගේම ඉවසීමක් අවශ්‍ය වෙනවා. ඒ නිසා විනෝදාංශයක් විදිහට අන් අයව විවේචනය කරන්න ගිහින් ඔබ පිරිහීමකට භාජනය වන්නේ නැතිව ඉවසීමෙන් වැඩකරන්න.

කඩුවෙල බුද්දෙ කළ සෙල්ලම්

කඩුවෙල හිටපු නගරාධිපති සහ කඩුවෙල ශ්‍රීලනිප සම සංවිධායකවරයෙකු වූ ජී. එච්. බුද්ධදාස මීට වසර පනහකට පමණ පෙර කරුණා සමග විවාහ වී මුලින්ම පදිංචියට ගියේ බත්තරමුල්ලේ 8 කණුව ප්‍රදේශයේ තිබූ කුලී නිවසකටය. සිළුමිණ පත්‍රයේ පළවූ දැන්වීමක් දැක 8 කණුව ප්‍රදේශයට ගිය නව යුවළ මසකට රුපියල් 75 ක් පමණ වූ කුලියක් ගෙවීමේ පොරොන්දුව මත එහි පදිංචියට ගියහ. ගෙදරට අවශ්‍ය වළන්, පිඟන් මිලදී ගැනීමටවත් තමන් අතේ මුදලක් නොතිබූ නිසා කරුණාගේ බැංකු පොතේ තිබූ රුපියල් 500 ක මුදල ගෙන එම අවශ්‍යතා ටික යන්තමින් පිරිමසා ගත් බව හෙතෙම පවසයි.

මේ අතර ගමේ විසූ තම දෙමාපියන්ගේ යැපීම සඳහා ද මාස්පතා රුපියල් 100 ක් ගෙදරට යැවීම ඔහු මොනම හේතුවක් නිසාවත් අතපසු නොකළේය. ඒ වනවිට ඔහුගේ පියා මියගොස් සිටි අතර මවටත්, නංගිලා දෙන්නාටත් ජීවත්වීමට සිදුවී තිබුණේ පියාගේ විශ්‍රාම වැටුපෙන් හා බුද්දෙ මාස්පතා එවූ මුදල යන්තමින් පිරිමසා ගෙනය. මෙලෙස මාස කීපයක් 8 කණුව ප්‍රදේශයේ පිහිටි කුලී නිවසේ විසූ ඔවුන්ට උඩුමුල්ල පාරේ පිහිටි ඊට වඩා තරමක් ලොකු නිවසක් රුපියල් 90 ක මාසික කුලියකට සොයා දුන්නේ කරුණාගේ අයියා කෙනෙකි. බුද්දෙලාට ඕනෑ නම් මේ ගේ සින්නක්කරේටම ගන්න වුණත් පුළුවන් මොකද මම මේ ගෙවල් අයිතිකාරයා හොඳට අඳුනනවා යි ඔහු කියා තිබුණද ඔවුන්ගේ ආදායම් තත්ත්වය අනුව එවැන්නක් ගැන සිතීමටවත් නොහැකි විය. එහෙයින් ඒ ගැන කලබල නොවූ ඔවුහු තවත් ටික කාලයක් එම කුලී නිවසේ වාසය කළහ.

මෙන්න මේ කාලේ බත්තරමුල්ල විහාර මාවතේ ඉඩමක් කැබලි කර විකුණන බව අහන්න ලැබුණා. මම නිකමට වගේ ඒ පැත්තෙ ගිහින් බලනකොට ඒක අපූරු ඉඩමක්. කොහොම හරි ඒ වෙනකොට ඉතිරි වෙලා තිබුණේ පර්චස් 49 ක් විතරයි. ඒ ඉඩම රුපියල් 9000 කට විකුණන්න අයිතිකාරයා කැමැති වුණත් අපි ළඟ එච්චර මුදලක් තිබුණේ නෑ. පස්සේ කරුණා වැඩ කරපු වාට්ටුවේ සිස්ටර් කෙනෙක් එයාට ඒ මුදල දීල තිබුණා. ඒ මුදලෙන් තමයි අපි විහාර මාවතේ ඉඩම ගත්තේ යි කියමින් තමන් දැනට පදිංචිව සිටින ඉඩම මිලදීගත් ආකාරය ගැන විස්තර කරන බුද්දෙ වැඩිදුරටත් සඳහන් කරන්නේ ඒ අසල විසූ තරමක චණ්ඩි පහේ පුද්ගලයෙකු එම ඉඩම් හිමියා සමග එහි අයිතිය සම්බන්ධයෙන් කලකෝලාහල ඇතිකරගෙන සිටි බවය.

“ඔය ඉඩමට අයිතියක් මටත් තියෙනවා”යි කී එම තැනැත්තා බුද්දෙ කටින් බය කර ගැනීමට සූදානම් වුවද “ඒක මම දන්නෙ නැහැනේ. මම මේ ඉඩම සින්නක්කරේට අරගෙන තියෙන්නේ. ඒ නිසා ඔහෙත් එක්ක මට කතාවක් නෑ”යි කී බුද්දෙ එම පුද්ගලයා සමග වැඩිපුර කතාබහට නොගියේය. එහෙත් තමන් එම ඉඩමට ගිය අවස්ථා කීපයකදීම ඉහත සඳහන් චණ්ඩි පහේ පුද්ගලයා ඈතට වී නමක් සඳහන් නොකර බැණ වැදුණේය.

“අර මිනිහ අපටනේ ද ඒ බණින්නේ”යි ඒ දුටු කරුණා ඇසුවද ඔහුගේ පිළිගැනීම වූයේ නමක් සඳහන් නොකර බැණීම ගැන තමන් කලබල නොවිය යුතු බවය. කෙසේ වෙතත් තමන්ගේ කටේ සද්දයට බුද්දෙලා බියට පත්වී ඇතැයි එම පුද්ගලයා සිතුවේය. ඒ අනුව ඔවුන් කටින් බයකර එළවා දැමීමට හැකි වෙතැයි සිතූ එම තැනැත්තා බුද්දෙලා ඉඩමට පැමිණි බොහෝ අවස්ථාවලදී ඒ අසලට පැමිණ අමු තිත්ත කතාවෙන් බැණ වැදුණේය.

“හරි මේකා හදන්නේ මාව කටින් බයකර ගන්න නේ. එහෙම නං මමත් මූව බයකර ගන්න ඕනෑ”යි සිතූ බුද්දෙ රුපියල් තුනයි පනහකට පිටකොටුවෙන් සෙල්ලම් පිස්තෝලයක් මිලදී ගෙන තිබුණේ එක්තරා යටි අදහසක් ඇතිවය. එය තනිකරම සෙල්ලම් බඩුවක් වුවද එහි පෙනුම සැබෑ පිස්තෝලයකට සමාන වූ බව හෙතෙම පවසයි. ඊට පසුදා ඉරිදා දිනයක් වූ බැවින් බුද්දෙ තම බිරිඳ ද සමග එම ඉඩමට ගොස් තිබුණේ එය ටිකින් ටික හෝ සුද්ධ කිරීමේ අදහසිනි. කෙසේ වෙතත් ඔහු කරුණාට නොදන්වාම අර සෙල්ලම් පිස්තෝලය ද ඉණේ ගසාගෙන ගියේය.

මමයි කරුණයි ඉඩමට ගිහින් විනාඩි දහයක්වත් ගියේ නෑ. මෙන්න අර මිනිහා පොල්ලකුත් උරුක් කරගෙන අමු තිත්ත කුණුහරුපයෙන් බැණගෙන වැට අද්දරට ආවා. ඒ මිනිහා මහ කේඩෑරි මිනිහෙක්. ඊටත් ඒ මොහොතේ කරටිය කැඩෙන තරමට බී ගෙනයි හිටියේ. ඒ සැරේ මම ඇහුවා තෝ කාට ගහන්නද යකෝ ඔය පොල්ලක් අරගෙන ආවෙ කියලා. මම එහෙම අහන ගමන්ම ඉණේ ගහගෙන තිබුණු සෙල්ලම් පිස්තෝලයත් අතට ගත්තා. මගේ අතේ තිබුණු ඒ පිස්තෝලෙ දැක්ක විතරයි මෙන්න අර යකා ආපහු හැරිලා පණ කඩාගෙන දුවන්න පටන් ගත්තා.

බුද්දෙ අදටත් එම සිද්ධිය සිහිපත් කරන්නේ සිනාසෙමිනි. එලෙස දුවගිය එම තැනැත්තා තවත් පිරිසක් සමග ආපසු එතැයි ඔහු සිතුවද හෙතෙම යළි නාවේය. මේ අතර එම සිද්ධිය ඒ අසල විසූ කීපදෙනෙක්ම දැක තිබුණහ. එහි ඊළඟ ප්‍රතිඵලය වූයේ විහාර මාවතේ කෙළවරේ පිහිටි ඉඩම මිලදී ගෙන ඇත්තේ වැලිගම පළාතේ නොම්මර එකේ චණ්ඩියෙකු යැයි ගමපුරාම ප්‍රසිද්ධ වී යාමය. කෙසේ වෙතත් බුද්දෙ ඉණේ ගසාගෙන සිටි පිස්තෝලය සෙල්ලම් බඩුවකැයි නොදත් කරුණා ඒ මොහොතේ සිට පටන්ගත් චුරු චුරුව නතර කරන ලද්දේ ඔන්න එහෙනං තමුසෙම බලාගන්නවා මේක ඇත්ත පිස්තෝලයක්ද කියලා යි කියමින් එය ඇගේ අතට දීමෙන් පසුවය.

නිහාල් ජගත්චන්ද්‍ර
ඡායාරූප අන්තර්ජාලයෙනි

ලුතිනන් කර්නල් ලලිත් ජයසිංහ වීර ක්‍රියා

හතර වන ඊළාම් යුද්ධයේදී ත්‍රස්තයන් බියෙන් සලිත කළ, ත්‍රස්ත පාලන ප්‍රදේශ තුළට ඇතුල් වී අදහාගත නොහැකි ප්‍රහාර එල්ල කළ 6 දෙනාගෙන් හෝ 8 දෙනාගෙන් යුත් යුද්ධ හමුදා විශේෂ බලකා කුඩා කණ්ඩායම් පිළිබඳව නොදන්නා කෙනෙක් නැති තරම්. එම ඒකකය හඳුන්වන්නේ විශේෂ බලකා රෙජිමේන්තුවට අයත් දිගු දුර විහිදුම් බළකාය ලෙසයි. (Long Range Reconnaissance Patrol – LRRP) මහසොහොන් බළකාය ලෙස හඳුන්වන්නේ ද මෙයයි. සතුරන්ගේ ප්‍රධාන නායකයන් ඉලක්ක කිරීම, ඔවුන්ගේ වැදගත් කඳවුරු සොයා පහරදීම හා විශාල කඳවුරු පිළිබඳ සොයා බලා ගුවන් හමුදාවට තොරතුරු සැපයීම ආදිය සිදු කිරීම මහසොහොන් බලකායේ විශේෂ රාජකාරී වෙනවා.

ඒත් අද ලිපිය තුළින් අප ගෙන එන්නට බලාපොරොත්තු වන්නේ දිගු දුර විහිදුම් බලකායේ නිර්භීත සංග්‍රාම පිලිබඳව නම් නොවේ. දිගු දුර විහිදුම් බලකායේ මෙහෙයුම් වලට නායකත්වය දෙමින් කොටි ත්‍රස්තයන්ගේ ප්‍රධාන ඉලක්කයක් බවට පත් වූ නිර්භීත සොල්දාදුවෙක් පිළිබඳවයි. ඒ 2008 වසරේ දැයෙන් සමුගත් ලුතිනන් කර්නල් ලලිත් ජයසිංහ පිළිබඳවයි. බොහෝ දෙනෙක් මෙම නිලධාරියාව හදුන්වන්නේ කොටි බල ප්‍රදේශයට ඇතුල් වී ත්‍රස්ත නායකයන්ට මර බිය ඇති කළ සොල්දාදුවෙක් ලෙසයි.

ලුතිනන් කර්නල් ලලිත් ජයසිංහ – අවිස්සාවේල්ල ප්‍රදේශයේ විසූ ජේ.ඒ.ජයසිංහ හා ඩි.ජී. සුමනාවතී යුවළට දාව තුන් දෙනෙක්ගෙන් යුත් පවුලේ වැඩි මහල් දරුවා ලෙස 1976 වසරේ අප්‍රේල් 29 වන දින උපත ලබන ලලිත් ජයසිංහ මූලික අධ්‍යාපනය ලබන්නේ අවිස්සාවේල්ල ජනාධිපති විද්‍යාලයෙන්. ද්විතික අධ්‍යාපනය සඳහා කොළඹ ලුම්බිනි විද්‍යාලයට ඇතුලත් වන ලලිත් පාසල් සමයේ දක්ෂ රගර් ක්‍රීඩකයෙක් ලෙස ජනප්‍රියත්වයට පත් වෙනවා. කැඩෙට් නිලධාරියෙක් ලෙස යුද හමුදාවට එකතු වන ඔහු 1997 වසරේ ජනවාරි දෙවන දා උප ලුතිනන් වරයෙක් ලෙස අධිකාරී ලබා 6 වන ගැමුණු හේවා බල ඇණියට ඇතුළත් වෙනවා.

හොඳම වෙඩික්කරුවා මහසොහොන් බළකායට දැක්වූ දක්ෂතා හේතුවෙන් පසුව යුද්ධ හමුදා විශේෂ බළකායට ඇතුල් වන ලලිත් විශේෂ බළකා 24 වන පාඨමාලාව සාර්ථකව නිම කරන්නේ පාඨමාලාව හැදෑරු 600කට අධික සොල්දාදුවන් අතරින් හොදම වෙඩික්කරුවා බවට පත් වෙමින්. විශේෂ ක්‍රියාන්විත වලට සහභාගී වීමට ඔහු තුළ තිබූ කැමැත්ත හේතුවෙන් 3 වන රෙජිමේන්තු විශේෂ බළකායට හෙවත් දිගු දුර විහිදුම් බළකායට ඇතුලත් වෙනවා.

පාඨමාලා අතරතුර – මින්නේරිය, ගණේමුල්ල, කුඩා ඔය හා දියතලාව හමුදා පුහුණු පාසල් වලින් සටන් පාඨමාලා හැදෑරු ලලිත් විදේශ පාඨමාලා රැසක්ද හදාරනු ලබනවා. ඉන්දියාවේ ගතක් පාඨමාලාව, ප්‍රතිවිප්ලවකාරී සටන් පුහුණු පාඨමාලාව, චීනයේ උසස් බලඇණි ආධාරක අවි පාඨමාලාව, ඇමරිකාවේ නිලධාරී මූලික පාඨමාලාව, බංගලාදේශයේ මූලික කිමිදුම් පාඨමාලාව, තරුණ නිලධාරී මූලික පැරෂුට්, පිස්තෝල හා වෙඩික්කරු පාඨමාලා ඒ අතරින් කිහිපයක් වෙනවා.

යුද්ධ බිමට – ශ්‍රී ලංකා යුද්ධ හමුදාවේ අති විශිෂ්ඨතම සෙබළුන් ගෙන් සමන්විත වන ශ්‍රී ලංකා යුද්ධ හමුදා විශේෂ බලකා දිගු දුර විහිදුම් බලකායේ අට දෙනෙක්ගේ කණ්ඩායමක් (WordPress.com) . 2000 වසරේ නොනවතින රැල්ල නම් ත්‍රස්ත මෙහෙයුමේදී ඊට එරෙහිව අභීතව සටන් කළ ලලිත්ට මෝටාර් උණ්ඩයක කොටසක් වැදීම හේතුවෙන් තුවාල සිදු වෙනවා. තුවාල සුව වූ පසු නැවත යුද්ධ බිමට යන ලලිත් නව ඒකකයක් ලෙස ආරම්භ කළ 3 වන විශේෂ බළකායට (දිගු දුර විහිදුම් බළකාය) ඇතුළත් වෙනවා. ඉහත දී සදහන් කළ ආකාරයටම ලලිත්ගේ 8 දෙනාගේ කණ්ඩායමට අයත් වූයේ කොටි පාලන ප්‍රදේශ තුළට රහසිගතව ඇතුල් වී මාස ගණන් වනාන්තරයේ රැඳෙමින් හොද අධ්‍යයනයකින් අනතුරුව සතුරාට ක්ෂණික බරපතල ප්‍රහාරයක් එල්ල කර පලා ඒමයි.

ශ්‍රී ලංකා යුද්ධ හමුදාවේ අති විශිෂ්ඨතම සෙබලුන් ගෙන් සමන්විත වන ශ්‍රී ලංකා යුද්ධ හමුදා විශේෂ බලකා දිගු දුර විහිදුම් බලකායේ (Special Forces Long Range Reconnaissance Patrol) කැපී පෙනෙන සාමාජිකයෙකු වූ ලුතිනන් කර්නල් ලලිත් ජයසිංහ දිගු දුර මෙහෙයුම් වල විශේෂඥයෙකු විය. ත්‍රස්තවාදීන් බියෙන් සලිත කල ලලිත් ඇතුළු සෙබළුන් කිලෝමීටර් 25-30ක් පමණ කොටි පාලන ප්‍රදේශ තුළට ගොස් කොටි මර්මස්ථාන වලට එල්ල කළ ප්‍රහාර නිසා ත්‍රස්තවාදීන් විශ්මයට මෙන්ම බියට පත්වෙනවා. මේ හේතුව නිසා ම තුන් වන බලකාය “මහසෝන් බලකාය” යන අන්වර්ථ නාමයෙන්ද හඳුන්වන්නට පටන් ගන්නවා.

පරම වීර විභූෂණය – කොටි අඩවියේ ගස් ගල් පවා හොඳින් අඳුරන ලලිත් ජයසිංහ මෙහෙයවූ අටේ කණ්ඩායමට සෑම සාර්ථක ප්‍රහාරයකින්ම පසුව ත්‍රස්ත ප්‍රදේශයෙන් පැන ගත හැකි වන්නේ අණ දෙන්නා සතුව තිබූ විශේෂ හැකියාව හා පළපුරුද්ද හේතුවෙන්. ඔහුගේ නායකත්වයෙන් සාර්ථක වූ විශේෂ ක්‍රියාන්විත බොහොමයක් හඳුනාගන්නට පුළුවන්. 2001 වසරේ සැප්තැම්බර් 26 වනදා උදය වරුවේ 10.45ට පමණ LTTE ගුවන් බලකායේ ප්‍රධානී කර්නල් ශංකර් රැගත් රථය වන්නි කැලය හරහා ඔඩ්ඩුසුඩාන් සිට පුදුකුඩිරිප්පු දක්වා ධාවනය වෙමින් තිබියදී ක්ලේමෝ බෝම්බයක් අටවා කොටි පාලන ප්‍රදේශයේදීම විනාශ කර දමන්නට ලලිත් අණදුන් අටේ කණ්ඩායමට හැකිවෙනවා. මුහුදු කොටි බලකායේ දෙවැනියා වූ කන්ගෙයි අමරන්ව ඝාතනය කිරීම සඳහා එවකට කොටි පාලන ප්‍රදේශයක් වන කිලිනොච්චි දිස්ත්‍රික්කයේ අක්කරායම්කුලම් වෙත හොර රහසේ ඇතුල් වන ලලිත් ඇතුළු පිරිස ඔහු ගමන් කළ පෙජරෝ වර්ගයේ ජීප් රථය ක්ලේමෝ බෝම්බයක් අටවා විනාශ කරනවා.

සන්නද්ධ බුද්ධි අංශ නායක කර්නල් චාර්ල්ස් නම් ඉහළ පෙළේ කොටි නායකයා ඝාතනය කිරීමට 2008 වසරේ ජනවාරි 5 වනදා හැකි වෙනවා. ඉලුප්පයිකාඩවයි සිට පල්ලමඩු දක්වා ගමන් කරමින් තිබුණු චාල්ස් ඇතුළු තවත් ත්‍රස්තයන් තිදෙනෙක් සිටි වෑන් රථයක් එදින ප.ව 3.10ට පමණ ක්ලේමෝ බෝම්බ මඟින් පුපුරවා හැරීමට කොටි පාලන ප්‍රදේශයට ඇතුල් වූ ලලිත් ඇතුළු දිග දුර විහිදුම් බලකා අටේ කණ්ඩායමට හැකි වෙනවා. වසර 10ක් යුද්ධ බිමේ සිටිමින් සිදු කළ බිහිසුණු ක්‍රියාන්විත හේතුවෙන් කැප්ටන් නිලයටත් අනතුරුව මේජර් නිලයටත් උසස් වීම් ලලිත් ජයසිංහට ලැබෙනවා. කොටි ත්‍රස්තයන්ට හිතන්නටවත් මොහොතක් ඉතුරු නොකර ක්ෂණික ප්‍රහාර එල්ලකරන මෙම කණ්ඩායම පිළිබඳව දැඩි බියකින් පසු වන LTTE සංවිධානය ඔවුන්ගේ ඔත්තු සේවා මඟින් මෙම කණ්ඩායම මෙහෙයවන්නේ ලලිත් ජයසිංහ බවත් ඊළඟ ඉලක්ක තවත් ප්‍රබල කොටි නායකයන් බවත් හඳුනාගෙන එය LTTE වෙබ් අඩවි වල පවා සඳහන් කරනවා.

අවිස්සාවේල්ල නගරයේ ඉදිකර ඇති ලුතිනන් කර්නල් ලලිත් ජයසිංහ විරුවාගේ පිළිරුව (slarmy-wasa.blogspot.com) 2008 නොවැම්බර් මස 20 වනදා විශේෂ බලකා සෙබළුන් අට දෙනෙකුගෙන් සමන්විත වූ ලලිත්ගේ කණ්ඩායම හමුදා පාලන ප්‍රදේශයේ සිට කිලෝමීටර් 40ක දුරකින් ත්‍රස්තවාදීන් යටතේ පාලනය වූ ඔඩ්ඩුසුඩාන් ප්‍රදේශයට ඇතුල් වෙනවා. කොටින්ගේ මහා වීර දිනවලට සහභාගී වීමට යන කොටි නායකයන් ඔවුන්ගේ ඉලක්කය විය. තමන්ට ලබා දුන් පළමු ඉලක්කය සාර්ථකව සපුරා ගත් කණ්ඩායම දෙවන ඉලක්කය කරා ඇදෙන විට ත්‍රස්තවාදී කණ්ඩායමක ප්‍රහාරයකට ලක්වෙනවා. මින් ලුතිනන් කර්නල් ලලිත් ජයසිංහ තුවාල ලැබූ අතර තුවාල ලැබූ තම නායකයා රැගෙන කණ්ඩායම උපක්‍රමිකව ආරක්‍ෂිත ස්ථානයකට පසු බසිනවා. මෙසේ පසු බැසීමේදී දින නවයක් තිස්සෙම වගුරු සහිත ප්‍රදේශ වල හමුදා සපත්තු පැළඳ සිටීම නිසා ලලිත්ගේ හා ඔහුගේ සෙබළුන්ගේ කකුල් කුණු වෙන්නට පටන් ගන්නවා.

අතර මඟ නැවත වරක් කොටි කණ්ඩායමක් සමග ඇති වූ දරුණු ගැටුමකදී හිසට වැදුණු වෙඩි පහරක් නිසා මෙම අභීත රණවිරුවාට දැයෙන් සමු ගන්නට සිදු වෙනවා. ඔහු බරපතලව තුවාල ලබා සිටි බැවින් ජීවිත අවධානමෙන් මිදීමට පසු පසට යාමේ හැකියාව තිබුණත් තම සෙබළුන් බේරා ගැනීමේ උතුම් චේතනාවෙන් නිර්භයව සටන් කළ හේතුවෙන් ත්‍රිවිධ හමුදාවේ, තම දිවි පරදුවට තබමින් තම මාතෘ භූමිය රැක ගැනීම වෙනුවෙන් වීර වික්‍රමයන් දක්ෂතා දැක්වූ තනි පුද්ගලයන්ට හිමිවන ජීවිතයේ හමුදා නිලධාරියෙකුට හෝ සෙබළෙකුට ලැබිය හැකි ඉහළ ම සම්මානය වන පරම වීර විභූෂණ සම්මානයෙන් පිදුම් ලබනවා. මීට අමතරව මෙම විරුවා වීර වික්‍රම විභූෂණ, රණ වික්‍රම යන පදක්කම් වලින් ද පිදුම් ලබන අතර මිය ගිය පසු මේජර් නිලයෙන් තවත් නිලයක් දක්වා ඔසවා තැබෙන ලුතිනන් කර්නල් ලලිත් ජයසිංහ නම් විරෝධාර රණ ශුරයාගේ පිළිරුවක් අවිස්සාවේල්ල නගරය හරහා ගමන් කරන ඔබට දැක ගන්නට පුළුවන්.

මූලාශ්‍ර: ලංකාදීප, දිනමිණ පුවත්පත්, ශ්‍රී ලංකා යුද්ධ හමුදා වෙබ් අඩවිය